Home / AMCHEM DAIZ

AMCHEM DAIZ

DEZ '05 – JAN '06  VORS 1; ANK 3

GOEM ANI GOENKARPONN
Bor: Chandrakant Keni

Jen’na ami Goem mhonnttat, ten’na amche nodre mukhar aiz Goem rajeacho zo avantth asa titloch vattar ubo ravta. Khoreponnim Goem adim aiche poros vhodd aslem. Sat Konkonna modlea Mahasaptam mhollear vhodd Konkonn, mhollear Goem. Taka Aprantui mhonnttale. Punn Purtguezamnim 1510 vorsa Bardez, Tisvaddi ani Saxtt (Murganvam soit) taluke ghetle tantunt Goem hem mukheo xar axil’lean hea vattarakuch Goem hem nanv poddlem. Tench dholl’llem ani urlem. Uprant sat taluke Goem prodexak zoddle. Thoim Purtugez razvott suru zali ani taka-i Goem mhonnunk lagle. Dekhun aichem Goem hem mannkulem asa ani thoinche porjek Goenkar mhonnttat. Goeant khub purvilea kallar savn Goenkar ravtat. Tanche modim dhorm’ bhed naslo. Zaticho bhed naslo. Udok, vot, varem hem Devan soglleam khatir dilam. Tech bhaxen bhuim. Ti sogllea lokanchi oxe Goenkar mantale. Te Goenche bhuimient koxtt korun pik kaddchem – neainit samballun bhavponnan cholchem ani apli sonskrutai tigovchi hem kam’ Gram Sonstha kortali. Fuddem porki razvotti aileo ani Gram Sonstha vikrut zali. Punn zhaddachim mullam bhuimient astat, te meren tim vaddttat, toxem monis somazachem-i asta. Bhaile razvottint tannem khub pidda-pidd bhogli. Somaz zolla-mollak ximpoddlo. Ekach ghorabeantlea kaim bhavank musolman kele, zalear dusream kaim bhavank kristanv kele. Eka dhormachea nanvan dusrea dhormachea mon’xacho dves korpachi xikovnn rajkorteamnim dili. Goenkarancho ekvott moddunk sonskrutik pormpora fuddem choloitolea Goenkarak zobor kheast ani pidda-pidd dili. Tanchi bhas ulounk bondi ghali. Bhes ani jevonn-khann vegllem korunk sanglem. Punn dhorm’ vegllo aslo tori Goenkaramnim aplo somajik ekvott ani bhavponn sodanch samball’llem. Itlo zulmi itihas asunui Goenkar Goenkar urle, hachem karann kitem?

Ekvottan kam’ korpachi amchi purvozanchi xikovnn. Tannim ekamekachea adaran somajik ekchar ghoddoilo. Xetkamacho vikas kelo. Dev-dhorm’ pallpachi xikovnn dili. Soglleant borem kam’ zor tannim kitem kelem asot zalear, Goenche bhuimie kodden natem nirmilem. Bhurgeachi nall zoxi avoi kodden bandil’li urta, toxi Goenkarachi nall, to khoim gelo tori Goenche matient roil’li urta. Sat doria hupun pois gel’lo Goenkar apleak Goeant moronn ievchem ani apli kudd zanntteleanchi kudd je matient bhorsolea, te matiek mellchi oxem anvddeta. Konknni amkam zoddtta, punn zo Konknni uloina to Goenkar legit Goenche bhuimiek nixttha ompun asa. Dekhunuch amchea ekvottachi kuru ani fuddaracho bhorvonso bhuimiecher adaril’lo urtolo. Dekhun avoi itlichamchi bhuim povitr asunk zai.

Poixe mellttat mhonn zo amkam vikunk toiear zata to Goenkar nhoich ani monisui nhoi. Ponn amchea Goenkarak tachem dukh na. Taka poixech dixtti poddttat. Poixeam khatir to kitem-i korta. Punn amchea bhurgeancho fuddar apunn kabar korta hem taka kollona. Fattlea 40 vorsant Goenchea lokancho ankddo zo adim 50 lakh aslo to aiz 15 lakhancher pavla. Amche bhangrache bhuimient Goenkarancho ankddo unnem zait asa ani zor zomin geli zalear, Goem kitlem-i girest zalem tori Goenkar Goeant urcho na. Ani Goenkar nasot zalear Goem koxem urtolem? Eka santan sangun dovorlam –

Goa ninguem levara,
Por se acabara
.

Goem konn vhorcho na. Tem apxinch kabar zat’lem. Him utram khorim zait kai?

Mornnachea tonddant pavil’le astanai ami amcheo chuko sudraun ghenant. Venchnnukanchea rajkoronnak lagun Goenkaram modem dhormik ani zati-bhed vaddoitat. Taka lagun Goenkaram modem futt poddtta ani fuddem-fattim zati-zati modim, dhorma-dhorma modim von’tti ubeo zat’leo ani bhaileanchem favtelem? Hacher upai kitem? Upai ekuch. Dhorm’, zat visrun, bhuimie koddlem natem vollkhun Goenkaram modlo ekvott, poromporen cholot ail’lem bhavponn ghott-mutth kelem zalearuch, azun Goem samballum ieta. Amche kodden dhorma-dhorma modlem zhogddem na. Hindu igorjent ani kristanv devllant vochun prarthna kortat. Oxem fokot Goeantuch ghoddtta. Hem amchem Goenkarponn. Tem samball’llem zalearuch Goem urtolem.

 

DHORM MHOLLEAR MONISPONN
Monis jen’na zonavoravori jivitantlean voir sorot soot somijikieche ani sonstutaieche vatten fudden sorot ravlo ten’na taka jem – jem kitem zai poddlem tantunt cholnukantli nit ani rit hi chodd gorjechi zali. Te khatir soglle manun ghetat oxe kaim jivitache nem zolmak aile. Hea nenak pallo divpak lagun ‘Dev’ ailo. Ani Deva sankari monxan lhanvikaien toxench taka nomon-prarthna korit jivit sarpachi rit aili. Dev mhollear ek povitr, uzu ani ekdom unchli chintna. Thoim fokot boreponnachoch porzoll asta – promannikponnak suvat na.
Boreponn, uzuponn vo fottkireponnak suvat na, Boreponn, uzuponn vo promannikponn mholleanuch puneavontponn. Jivitant jem kitem borem mhonnun asa tem puneo vo puneavontponnachi dusri bazu mhollear pap. patok. Mon’xan Devak iad korit borem tench korunk zai. Dusreanchem vaitt korunk zaina. Dusreank dukhounk zaina. Dusreank vaitt utram diunk favonant. Nit soddun cholunk zaina. Dusreank fottovn apnnalo suvarth sadhunk zaina. Mhonnchech he xikovunne add jem kitem asa tem pap, patok. Mhaka dista mon’xak ek somaz, ganv, prodex vo des hancho ek sandho mhonnun jivit jievpak soglea borea gozalinch goroz asa ane tench vevosthitponnan soglleank koll;lench ani te proman mon’xan cholchem, vagpachem hantleanuch dhorm’ hi kolpona zolmank ailea. Thoddeach kolpona zolmak ailea. Thoddeach utrannim sangpachem zalear mon’xa modlem monisponn jivem dovrun taka sonvsarant jieunk vatt dakhovpak mholleanuch dhorm’ Tachem mull ani tanchea upeogachem karanni ekuch monisponn.

Monisponnache gunn, sonvsarantlea khuinncheai mon’xache eksarkhech. Punnte somzun ghevpachi ani cholnnukent haddpachi rit ghoddie veggli zait. Karann Bharatantlo monis hea monisponnache cholnnuke kodden je nodren polleta tech nodren chinant thoi monis pollet mhonnem sangun nozo. Evropantlea mon’xachi nodor anikui veggli asum -ieta.

Mhollear nodrecho angle – druxttikonn fokot droxttikonn. Cholnnuke fattlim mullavim mulean nhoi. Mulean sogglim ekuch. Punn tim somzun ghevpachi rit vo tora, dor eka desa proman, thoinche bhugolik, poriavoronnie vo somajik porithiti promann veglli asum ieta. Dekhunuch dhorm’ magir to khoincho-i asun. Tache xikovnn ken’nach tujem pott bhorpak dusreak nagoi, fottoi, marun voddoi mhunn sangchi na. Toxem sangop mhollear onit zali. Ti zonavoram modim cholta. Vag-xinva sarkim vhoddlim zonavoram sorso, pisoi, kurong sarkhea lhan zonavorank marun apnnalem pott bhortat. Monis oxem korunk xokona. Karann tache mukhar nit ani tantuntlean ievpi xikovnn asa. Tori astana, ekadro ek bollixtt monis, gorib dhaktteak piddapidd ditach, taka naddta – fottoitach – Ani hem manun ghenat. Karan ti onit. Ani onit mhollear dhorm’ nhoi.

dhorm’ vixinchi xikvonn tora bhasamnim lokam mukhar ail’li. Polleunk mellta. Shri Bagvadgita mon’xak nit, bori cholunk, uzuponn xikoitana, chodd unchlea panvddear ravon jem kitem sangunk zai tem sangla.Monis svarthak lagun patok adarta. Fottingponnam korta. Dusrea utramnim sangpachem zalear, tum jem kitem korta tem sogllem Devacher sodd. Axe-khorponna korit ravit zalear patkant poddtolo. Bhagvan Buddh hench dusre toren sangta. To mhonnta, vosvoxeponn, hanvponn hem mhojem, tem mhojem oxem chintop hench sonvsarantlea sogllea dukhachem karann. Dukh-khont naka zalear suvartha mekllo za, hanvxponnantlean bhair sor mhoje somzonne promann Bhagvan Yesu Kristachem vo Mohammed Paingamber hanchea xikovnnechem-i mull haceh poros vegglemna, Yesy kristan sonvsarak premacho, mogacho sondex dilo. Islam monxamo-nxamodem bhavponn kellovpachi, vaddovpachi xikvonn dita. Amchea Bharotantlea ruximnim, hancheai mukhar vochun mhollem – vosudhevkuttubkom’ mhollear, ho sogllo sonvsar mhollearuch ek kuttumb, ek parivar. Ganv, Prodex ani raxttr hankam hupunn vochpi oso ho vichar. Angele Sant zaun magir to kabir, Tukaram Dynaeshwar, hea soglleamnim amkam bhavponnachi xikovnn dilea kabir mhonttalo, konnem konnathi zat-pat vicharpachi na. Zo konn Devak bhozta, noman korta to Deva choch zata.

Sonvsarant mon’xak jievpak ghordar zai, xet-bhatt zai, vepar-dhondo zai, nokri-chakri, dudu girestkai zai. Khori gozal thoddeam koden khub girestkai astoli. Thoddeam kodden ti nastoli. Punn hem sogllem uzu ani nit samballun ghoddunk zai. Dusreank nagovn, fottovn vo huttun girestkai korun nhoi. Zache kodden khub asa, te zachem ghor bhorun dar otta, taka dusrea gorib durbollanchea uleak pavpakui kollonk zai. Fokot apunnalench ghor bhor bhor bhorit rav oxem nhoi. Bhorta tantuntlem, na tanche khatirui il’lem il’lem rokoi, ot. Oxem kel’lean zagelem ghor bhorot ravta, tea ghorant novem-novem bhorun ghevpak thoddi tori suvat zat’li. Ani zagelea ghorant kainch na, tacho suki’lo tallo mat tori olo zat’lo. Tachea rikamea pottachi kolli mat tori bhortoli. Hich monisponnachi nodor.

Dhor’m mhonnttat to oslench monisponn xikovpa khatir asa. Toch dhormacho khoro orth.

Naguesh Karmali
(Ekcharachi Yatrachea upkarant)