AMCHO LOK

VEAAM BRAGANZA: Mhonvall avazachi gavpinn
Bor:
BDP

Pomburpa Saloi vaddeant ek modhur talleachi sallor gaita. Ticho tallo aikotoch Lornachoch koso dista, punn taka polloitoch gomta tem umedvont tornattem Veeam Braganza mhunnon. He sobit gavpinnimchim kantaram vochot thoim aiz aikonk ietat, chodd korun vhoddleam hotelamnim. Porum toxem onvddum IFFI mahaotsavachea vellar tannem gailelim gitam kitleaxeach lokan aikoleant.

Goem muzgamni toxench tiatristamnim bhorlam. Punn kitleam muzganchim vo tiatristanchim bhurgeamni aplea avoi-bapaicho veavasai vengoila? Bhov thoddeamnim, ani tanchea modhem amchea borea noxiban Veeam mellta. Tacho bapui, soglleanche vollkicho Bond Alfonso Braganza ek gitam rochpi, gavpi ani kolakar, zannem soglli urba ani adhar dhivun aple dhuvek, Veeamank, Goenchea songitachea ontrollar ek novem porzollit noketr kelam.

Sat vorsanche piraer Veeamanchem tachem poilench kantar Bondache Mhaka Jievnk Dhi kesettir Konknni mogianim aikolem. Uprant heraim khup kesettenim tem gavunk laglem.

Mhapsa Market Association dor vorsa Natalanchea somoiar ek suman bhor kariavoll ankarta. Eka vorsa tannim Chris Perrycho musical show haddlolo. Tea disa Chrisan ghoddlelim ani Lornan gailelim don kantaram Pitti, Pitti Mog ani Calangute Veeaman gailim. Chrisan tachea kantarak vazoilem ani borem korun aikolem. Anink ek Lorna ubzolem mhunnon thoim ekttovlelea Mhapxenkaranim tea disa mandun ghetlem. Chris boroch koxi zalo. Dusrea mhoineant Chrisacho toch Musical Show Chinchonneam zavpacho aslo. Chrisan fon marun tantun vantto ghevunk Veeamank apoilem. Chinchonnkarancho toch somzut zalo…Konknni machier anink ek Lorna udelem.

Uprant tachea talleachi porikxa (test) korunk Chrisan taka Moddgovam aplea ghora ievnk apovnk dhaddlem, ani aplea Lisboa kantaracher tannem ti porikxa ghetli. Bhurgem Veeam matxem vhoir-sokol zatalem punn Chris taka zagear haddttalo. Punn hem khup usram zalem, durdoivan Chrisacher pidden chopko marlo.

Siolent vorsavollicho Sao Joao-cho utsov aslo. Hea dobajeak hajir aslelea dha ozar vhoir lokak Veeaman dipkavn uddoilo. Teach dobajeak Bagantlea Ronil Hotelacho menejer Rui Madre Deus hajir aslo. Tannem Veeamank aplea hotelant gavpak kontrad dilo. Tea disa thavn tem thoim neamit gaita. Toxench Sweet Chilli, Trafalgar Chowk ani heram hotelamni kantaram korun bhonvddekarank dhadoxi korta.

Heach vorsache survatik Kuveittche Konkani Heritage Kuwait sonsthen aplea vorsavollichea show-ant vannto ghevnk Veemank khas Goeam thavn thoim vhelelem. Aplea kantaramnim, ani child-like rupant tannem thoimsorlea Goenkarank toxem herank sarkhench pixem lailem.


Anna osli khellgoddi fuddarak mellonk kottin
Dezembrache 5ver Goenchea khellamollar ek vhodd dukhichi ghoddni ghoddli. Girvoddea Bardezant ravpi 56 vorsanchi Anna Figueira, ji Customs Khateant Superintendent asli, ti kankrachea duensan sonvsarak ontorli. Dezembrache 7ver tichi kudd matiek laili. Annachem nanv Goenchea khellachea itihasant sodanch bhangarachea okxeramni boroilelem astelem. Khellantlean melloilea iesantlem tinnem gorv kednanch mandlemnam, punn sodhanch khaltikaen ani mogan heram khellgoddeam thaim sodanch vagli. Tichea mogall sobhavacho ugddas korun aiz pasun tiche boroborchim dukhache suskar soddtat. Xallent tem kolejint pasun tinnem khellant apli kopxi dakhoili ani fank zoddit ravli. Ti Bharatachea Hoki pongddak khell'li ani xekim 1975 vorsa tika Goem serkarachem Jivbadada Bakshi Bahaddar pod favo zalem. Uprant zantteanchea khellamni ti ontor'raxttrik namna zoddunk pavli.

 

JAYANTIN KONKNNINK GHATLELEM SAREM GINEANANK BOREM

Goa Vidhiapithachem staponn zalelear vis vorsam zavn gelim, punn itleam vorsam pottim Konknnint azun pasun konnakuch PhD podvi favo zaunk nasli. Jayanti Naikan hem sogllem bodlun uddoilem.
Amonnem-Kepem ganvantli Jayanti ek boreantli bori Konknni borovpinn. Xodh lavpachea vavrant tinnem borich namnna zoddlea. Ti mhonnta, "Eke bailek monachi svotontrai mellona zalear orthik svotontrai mellon kosloch faido na. Hi svontontrai mellpak tinnem veovosthit toren xikxit zavnk zai.” Konknnintlean poilich Goa Vidhiapitachi PhD podvi mellovpacho man Jayantik khoroch favo asa.
Tichea xodhacho vixoi aslo "The image of women in Konkani folklore: A socio-cultural study" (Konknni lokvedant ostoreancho vantto: Ek somajik-sonstrutik Xodh), zo tinnem Dr Olivinho Gomes, Goem Vidhiapitacho adlo Konknni Vibhagacho Mukhel, hachea margdorxonnam khal toiar kelolo. Aiz pasun tinnem 12 pustokam boroileant ani Athang pustokak tika Sahitia Akademicho puroskar favo zala.
Lhan kotha borovpan ti ekdomuch huxar. Goenchea lokvedachem tika khup pixem, ani hem mhonnchem amchea samajik ani sonkskrutik prokaramnim bailancho kitloso vantto asa ticher Jayanti khup bhor ghalta. Dhalo, Dinllo, Katyo, Zoti ani her prokarant ostoreamnim aplem bhorpur daiz dovorlam ani hakach lagon ho lokved ami sambhallun dovorpachi chodd goroz asa. Jayantichem vornon “Who's Who Asia-Pacific”, “Biographies International” ani dusream pustokamni vachunk mellta. Tichi lhan kotha “Bassavo” British Council Division hannim kherit bailanche website-ik vinchun kaddlea.
Jayanti atam Adhari Chitnis mhunnon Goa Konknni Akademint kam korta. Tika hi podvi Goem Vidhiapithache Ottravea Convocation-ant, Dezembrache 17ver, Xri Montek Singh Ahluvalia hachea hatantlean Kala Akademichea vosreant bhetttoilet.
Taka xebaski divpak sodhtat tannim 2662422 (ghora kodden) ani 2437385/87 (kocherint) fon korun, toxench gokademi@sancharnet.in hea email-a vhoir sompork korunvieta.

 

 

GOENCHEM STEFFI
BHARAT DES GAZOITA

Adlo Goencho oznadik goalkeeper Eugenio Cardozo hachi dhuv, Steffi Cardozo, Candolim ganvchi, gel'lea tin chear vorsank, Goeank toxench Bharat desak tannim khub nanv mellovn, sarkhem vhoir tenkxer pavlam. Athletic khellan ani chodd korun tachea shotput event-an.
16 vorsanche khorem, punn Goeant tannem 12 record moddun aplea nanvar kantoileat ani veta thuim ani khuim hat laita tem taka bhangar, rupem vo kanxeachim podokam zatat.
Steffichea iesak lagon, Goenchea Sports Journalist Association-an taka Goenchem “Best Sportswoman of the year 2004” mhunn puroskar bhettoila. Tech porim, Kala Mogi, Candolim, Lions Club, Candolim, Candolim Sports Club, Alto-Betim Jaycees hannim tacho sotkar korun puroskar bhettoileat.
Zorui tem xikpan ani gavpak chodd huxear, torui tannem chodd lokx khellant melloilam. Mettrikeche porikxent Candolim ganvant tem poilem ievn Candolim Panchaiticho puroskar taka mell'la, toxench tannem kantaram gavun Kala Akademiche puroskarui melloileat, ani Nach Baba Nach, he aplea bapaiche kesettinui tannem “Fahidu” mhunn git gailam.
Indieche ostomtek (West Zone) athletic-achea khellant tannem gel'lea chear vorsank Goeank 14 podokam mellovn dileant ani don nove rikord toddun aplea nanvar boroilea.
National Championship khellan ak'khea Bharatant spordha zatat tantun gelea oddez vorsank Goeank 13 raxttrik podokam jikhovn dileant, segid, ekui pavtt haronastana.
Goenchea athletic khellachea itihasan kednanch oslem ies konnakuch favo zavnkna. Aiz Bharat desbhor athletic-achea mollar tem chodd famad.
Tea bhair azun hem bhag khoincheach Goenkarak favo zavnkna tem bai Steffik favo zalam, tem mhunnllear tannem National Inter-District Athletic Championship record moddun aplea nanvar kantoun, Goenchea itihasan apunn khorench ek oznadik nokhetr mhunn nanv melloilam.
Hea tachea vavrak sorvbhonvtim Goenkar tachi bhorpur apurbai ani thoknnai kortat ani zaite zann mhunnttat, zori ontroraxttrik athelic khellan nanv Goenkarank mellovnk xeokeotai asa zalear ti bai Steffik.
Hea tachea moladik vavrak lagun taka Bharat sorkaran, Human Resource Ministrin, New Delhi, taka vhoddant-vhodd manacho puroskar dila “National Award for Exceptional Achievements in the Country”.
Komich-xem tem 25 pavtti Goenchem protinidhi koxem tem Indie bhair gelam. Tannem khellun nanv melloilam ani protek ek-eka xarant tannem podokam jikun Goeank nanv haddlam
Hi tachi ek vaitt sonvoim kai? Ratchench nhoi, tem disachem legit sopneta ani chodd-so tacho vell heam sopnamni sarta. Ani tim sopnam mhunnllear Bharat desachem protinidhi zaun Asian Games World Common Wealth Games khellamni medali melloun Bharatak ani Goeank vhoddlem nanv haddunk.
Ani toxench eka disa Bharat desacho bavtto gheun Olympic moidanar ubhem ravunk.
Zaite pavtti amchim sopnam tim sopnanch urtat ani sopnam na tor munis khuinch pavunk xekona.
Punn sopnel'lea mun'xakuch tank asta sopnam purim korpak Goenchem ek-ek ghor ani ek-ek Goenkar tachea fattlean asa ani astole.
Him tachim chintnam ani sopnam purnn zavpak. Steffi bai, khorench Goenkaranchi tum apurbai. Tum unch-unch gelelelm amkam ek-eka Goenkarak zai.

Prabhuk Kullagar Puroskar
Moddgonvchem Kullagar Prakaxonn vorsachea vorsa Konknni molleant boro vavr korpeank aplo puroskar bhettoita. Hea vorsacho Kullagar Literary Puroskar Dezembracher 18ver, K Gokuldas Prabhu hankam Ponnjechea Menezes Braganza vosreant ek kherit dobazo ghoddovn haddun divpan ailo. Hea 50,000 rupianchea puroskara borobor ek citation ani memento asa, zo Prabhun Konknni bhas, sahitia ani sonkrutichea vavrantlean melloila.