MUKHEL KHOBRO

DEZ '05 – JAN '06   VORS 1; ANK 3

NATALANCHI POROB
GHORABEACHI POROB

Vorsa pottim zaiteo porbo ami somboromtanv. Punn, Natalanchi porob, kherit ghorabeak lagu zatoli porob.

Devan mun'xak rochlo, Tannem ghor bandun diunk nam, punn ghorabo ghoddun dilo. ‘Mun'xan eksuro asunk borem nhuim, taka sangatin korun dium-ia’ . Avoi-bapui, bhurgim-ballam, xapai-xamaim ani ghorant aslelim sogllim ghorabo ghoddttat.

Poilea avoi-bapain patok kelem. Devan ghorabo moddunk nam, portem zalear Soddvondar ghorabeant zolmolo ani Tacheach zolmachi porob Natalanchea disa ami somorombtanv.

Jezu, Maria ani Jose, amchea ghorabeache nomunne. Hea ghorabeacher zaitem odruxtt, atte-vitte, dukh-konisttaieo kaddcheo poddleo. Punn, Devachi khoxi mhunn tannim mandun ghetlem ani sogleam addkhollincher zoitivont zalim.

Ghorabo ek dhakttulich Igrog (Domestic Church). Zuim xanti somadan vosta, ani hich xanti gheun Jezu ailo ani to zolmola tea vellar boddveanim git gailem “Gloria in exelcis Deo, et in terra pax hominitius bone voluntatis” Onod Devak sorgar ani XANTI sonvsarant borea monachea mun'xank. Natalam somoiar amchea jivitacher nodor marum-ia ani xanti vibaddpacheo korneo poisanv-ia. Amche ghorabe povitr ghorabea sarkhe korum-ia ani ami xantiche dut zanv-ia. Tednach ki Natalanchi Porob amkam zonn ekleak ani amchea ghorabeak folladik anik orthabhorit zatoli. Oslich Porob tumkam sogleank anvddetam ani, Happy Christmas mhunnttam.

Tumche Sevek
Fr. Agapito D’Cunha
Vigar, Sam Minguel Igroz, Anjuna.

 

PORJECHI TAKOT: INGOCHO BAZAR PEDNNEKARAMNI BOND UDDOILO

CHOPDDEM: Ingocho Saturday Nite Bazaar atam konnakuch naka mhunn Sonvardis Dezembrache 17ver Chopdem-Agravdd ani xezarcheam ganvchea lokan sidh kelem. Oddfoddem ani Asaganvchea lokan hea bazarak dar bond kelea uprant, to suvat sodit-sodit Xapora nodiche poltoddi Chopddem ganvant pavlo.
Asaganvchech porim Chopdem-Agarwada ponchaiatin apli porvangi dili, punn lokak tanchem bilkul mandonk nam. Dekhun Chopddem, Agarvaddo, Morji ani Parxeam ganvcho lok ragan utton zomati ghetleot, nidorxonnam kelimani xekim Dezembracher 17ver Chopdem, Morje, Parsem, Arambol ani heram ganvcho lok vhodde urponjen ekttovlo.
Don horam sumar Arambol vochpacho rosteavhoili vahatuk bond urli.
Saturday Nite Bazarak vikrekar aslelet tankam dhomki dili, ani te hollu thoimsorle koddsorun gele.
Bazaracher virodkh korpeanchem mhunn'nem asa ki oslo bazaar soma-zacher, sthanik sonkrut-icher ani vhodik korun tornatteancher tacho vaitt porinnam zatolo. Vahatuk ani produxonn vaddon soglleancher vaitt porin-nam zatolo to vegllench, punn xalleanchea porank ani zantteank ekdom dhokean dis sarche poddttelet. Sonvaradis, Dezembrache 10ver tachea poros vhoddle sonkhen sogllo lok ekttovlo ani Nite Bazarak virodh dakhoilo. He bhovxik zomatint ulovpeam modhem aslet Shiv Senacho Ramesh Naik anim GSRMacho Devendra Prabhudesai. Xevttim Pednekaranchea proitnank eis mell’lem. Tankam amchi xebaski.

 

NATLAM NIMTAN

Bor: Daniel F de Souza
Ho Goencho Ulo-cho ank chaapun ieta ani to tumchea hatint poddtta mhollear Kristi ghorabeanim kaillint gorom tell sull-sulltelem ani tantun nevreo, kol'kol foddfoddun nachunk lagtele. Adventacho kall suru zalo mhonnttoch Natalam lagim pavleant hem sidh zata. Atanchea kallant dis-mhoinne khub rostent dhanvtat ani Natalam-Novem Voros rokddea-rokddench amchea umbrear pavta. Horxinch amchem mannkullem Goem sap bodol'lam. Amchea kaim doria-degecheam vattharanim (coastal areas) pollelear ani thuim zata te nach-kormunnuk kosak lailear Goeant vorsache barai mhoinne Natalam zatat kai dista. Punn, ti khoxealkai bhaili ani addechi, ti orthaborit nhoi. Natalanchea somoiar bhogta ti khoxeallkai veglich ani dusre khoxealkaiek sor korunk zaina tosli.
Natalanchi porob nhoich bogor sonvsar bhor Kristi porjek ek khoxealkai ani dadhosponn haddtta punn tanchea vangdda her dhormacho lok legun he dobajik porbent vhodda khoxalkaient bhag ghetat ani Natalanchi khoxealkai tanchea Kristi ixttam-sezaream borobor maie-mogan onbhovtat. Hi porob veg-veghlea dhormanchea lokank eke toren ekthaim haddtta, tancho ekvott zoddta. Amchea Goeant ani toxench her zageanim somajik mhollar, ganvanim vaddeanim, ani kherit ponnim sorkari ani khasgi kocherinim hi Natalanchi porob kamdar bhav-bhoinnim vhodda nettan ani ekvottan monoitat, ani eka mekak mogachi veng marun porbechi khoxealkai vanttat. Hea somoiar tanche modhem vostole bhed-bhav kodek dovrun eke atvech soirigotichem natem bhanddun haddttat. Punn durdoivan hem natem zaite pautt tatpurtem zata. Khoreponnim oxem zavnk favonaslem. Hem bhavponnachem natem aichea somazant sodankal togon urovnk bhov mhotovachem.
Tor hea Natalam somoiar tujea jivak kitem bhogta? Koslea mona-kallzan tum Ballka Jezuk ievkar divnk axetai? Natalamche porbek nove kopdde xivonn, nove moche gheun, borem jevonn korun, ani dansak vochun movza marunk ievjitai vo khorench kallza monachi bori toiari korun bhailo bhopko nastanam Ballka Jezuk ievkar diunk tujem mon asa? Zorui vorsache bara mhoinne sompot ietat ani tuka tujea jivitacher ek bhitorli nodor marunk tuka azun ek soeg ani vell mellonk nam tor, atam tori hea vorsache nimannea sumananim tujea jivitacher ek bhitorli nodor marunk thoddo vell sambhallun dovor. Tujem jivit ontoskor'nachea ani moriadiche xime bhitor urlam vo tem chukon xime bhair pavlam, hacher niall korunk ho ek boro soeg.
Niall keloch mhunn zaina. Zorui tuka dista tumvem khuim tori jivit sudhravpachim panvlam marunk goroz asa tor tim panvlam novea vorsant ubharunk tumvem ek nirnnoi gheun goroz. Ani he dixent cholonk Novea Vorsacho nichev kelear kainch vaitt nam. Amche modhem zaiteank ek bori sonvoim asa Natalam somoiar zantteanchea ghoranim ani onath axramanim (orphanages) bhett divn tankam Natalanchi khoxeallkai vanttunk. Hi egdom bori kornnim. Punn osli bori vagnnuk ami fokot Natalam somoiaruch kiteak dakhoitanv? Osli bori kornnim amchean vorsachea her disanim legun kiteak korunk zainam? Oxem kelear hea somazant ani sonvsarant khori khoxealkai purnponnim vostoli ani dor disa, dor mhoineank vorsache bara-i mhoinne Natalanchi khoxealkai sodanch amcheach nhoi bogor goribanchea, her nirbhagi oddchoneak ani dukhak sampodd-loleanchea kallzamnim ek uzvaddachi pontti zaun pettoun urteli.
Somia Jezun sonvsarant haddloli khori Natalanchi khoxealkai zonn ekleak tumkam hea Natalanchea somoiar favo zanv ani tumchea kuttumbant khori kallza monachi xanti ani mog sodankal vosum. Soglleank tumkam Khoxeallbhorit Natalanchi porob anvddettam!
Daniel F. de Souza,
e-mail: dannyboy04@rediffmail.com
danielf@sancharnet.in

 

FLORIAN VAZ
Maim pasot put bolli, minnank bhurgeanchem kiteak poddlam

Sorgest Felicio Cardozan Janerache 1987 GULAB nemalleacher lekh xaptannam, Sompadpi (atam sorgest) Pri Freddy J da Costan oxem boroilelem:
“Amchi rakhonn korunk amcho sorkar pulis dovorta. Punn pulisuch jen'nam khuni zavn lokancho ghat gheta ten'nam porjechi rakhonn konn kortolo? Bhaxechea nanvan Goenkar hutatme zale, Goenkaranim rogot varoilem, sot mat ken'nanch khala apttunk dilem nam. Moddgonvam ghoddlem tachi khas ani kherit batmi Felicio Cardozo dita. Tannem Moddgonvche pulisen vortomanpotranchea khobrekarank dileli press note asa tosich Konknnint utravn xapleli. Ani tachea sokhol oxem boroilelem:

“Khoreponnim hi voili khobor samki fottkiri, ani pulisen apli kat rakhunk mud'dom' lobaddponnim ti dil'li. Khori ghoddni vegllich asli.

Son'vara (20-12-86) donparam Gogllant, pornne Chowgule Kolejichea vattharant GDL 9945 ho Matador Tempo pavlo. Tantunt zaite pulis bhorun asle. Gogllantlea eka Naik nanvachea mon'xan GDF 1174 hea Fiat mottoran Moddganvche Pulis Chovker vochun tea pulisank haddlole mhonn thoinche lok sangtat.

Te pulis ienvche ievun ube aslolea lokancher latthio marunk lagle ani rostear thavn sumar xembor metrancher aslelea Floriano Vaz, hea 22 vorsanchea tornatteachea ghorant gele. Tea vellar to vosrear bosun jevtalo. ASI Narayan Yetle ani her pulisamni hea tornatteak latthiamni khub boddoilo. Uprant taka zobordosten ghorantlo bhair kaddlo.Ghorabhairui taka zaito pettlo. SRP-chea eka pulisan Florianacher far marlo, punn to far chuklo. Aplea bhavak jivexim marinakat mhonn tachi bhoinn, Konseisanvan pulisankodden zaitem porathlem. Tinnem don pavtti bhavak veng marun kuxik kaddlo. Hea vellar pulisechea adhari up-nirikxok Yetlen galliancho pavsuch ghalunk nam punn Konseisanvank legun, tem cheddum mhonnonastana, khub boddoilem.”

“Floriano maran jam' zavn sokol poddlolo astana pulisechea adhari up-nirikxok Yetlen tacher far marpacho hukum' soddlo. Ten'na Rajaram G Pawar nanvachea 34 vorsanchea Gujrati pulisan doia-maia nastana Florianachea komravoir bondukecho far soddlo. Gulli pottantlean bhair sorli ani ghaveantlean rogtam-zhori vhanvunk lagleot. Hi ghoddni donparchea sumar 1.20 vorancher ghoddli.

“Floriano gombhir zokhmi zavn foddfoddtana pulis taka thoinch sanddun gele. Tea vaddeantlea lokan, ghorcheamnim ani xezareamni Florianak tea disa donparchea sumar 1.45 vorar Hospisechea hospitalant haddlo. Punn Pulisen Hospiesechea voizak chitt (ank 11452/86) dhaddlea te pormonnem dista ghaiall zal'lea Florianank Pulisen haddun hospitalant ghatlo mhonn!

“He ghoddne vixim ji tokrar Inglezint Moddgonvche Pulisen nond kelea ticho Konknnint orth oso asa: 'Moddganv Nogor Pulis, Khottlo ank 444/86. Kal (20-12-86) donparam, sumar 12.30 vorancher Gogllant 400/500 addguddaio korpeamni ekttaim zavn rosteancher addkholli ghatleot. Pulisancher fator, dandde ani her marekar hatiaram marun hol'lo kelo ani pulisanchim-i hatiaram kaddun ghetlim. Latthincho upeg zaunk nam dekhun Pulisen far marunk suru kelem. Sokol dakhoil'lea IPC-chea 341; 143; 347; 148; 323; 353; 332 ani 307 kolma khala ho khottlo nond kela ani mornachi-chikitsai (post mortem) korunk maglam.'

“Fotticher ani fottingponnacher adharlolo khottlo ho!

“Dusrea disa, Aitara sokallim Dr Silvano Dias Sapeco Florianachea pretachi chikitsai korunk ailo. Sumar sokallchea dha vorancher to prêt-ghorantlo (morgue) bhair ailo ani Deputy Collector-ak, tech porim Moddgonv xarachea Pulis-nirikxokak (inspector) fon kele. Thoddea vellan Dy Collector, Xri KK Sharma, ani PI Joe D'Souza Hospisent ieun Dr Silvanak bhettle. Te sumar 15-20 min'teo uloile.”

“Punn Dr Sapeco dobavachi porva korinastana nitt ravlo ani fottingponnacho vako boroinastana sot aslem tench sanglem.”

“Bab Floriano Vazachi kudd Dezembrache 23ver Moddgonvche ximitorink matiek laili. Hozaramni lokamni taka zodd kallzamni nimanno solam' ani adeus kelo. Aple Konknni avoibhaxe khatir Bab Floriano hutatmo zalo!”

He dukhest ghoddnnek aiz vis vorsam bhortat. Atam Floriano Vazacho konnank tori ugddas ieta kai?