OGRLEK

CHOVE-CHEALLIS VORSAM UPRANT

Amche purvoz je amrut ghoddiek dis-rat anvddetalet ti ghoddi Dezembrache 19ver 1961 vorsa uzvaddli. Sadde-chearxim xekddeancheo okhondd sanklleo suta porim tuttleot. Datt kallukant xekim uzvadd fanklo. Bhirant koddsorli. Xekim Goenkar mukt zalet, aplo porzollit fuddar, zodd chepnnenk poddleleo axea, sobit sopnnam toddik pavovpachi tank Goenchea putam-dhuvanchea hatamni poddli. Amchea prodexacho fuddar ani vikas tharovpachi zababdari te itihasik Dezembracher eknisver thavn amcheam bhuzancher denvli. Amchem borem-vaitt aminch ievzunchem ani fuddlem panvl ukolpachem dhaddos amkam poilech pavtt thavem zalem.

Vorsanchim vorsam ami amcheach ghorant porki aslet. Pottachi bhuk marpak, aplea mogall kuttumbak ganv-ghora dovrun, sat somdiram poltoddi amche purvoz jiv-muttint dhovrun tarvantlean porkeam desamnim vochon abzovtalet. Vegllea ganvan gham' vharovn koxei tori mhoineachea mhoinea duddu Goeam pattonvche poddttalet, karann hanga dispott'tto giraiz zoddpachi axea nasli. Tea bhair, amchea daizachem hok’ magpachim sopnnam pasun pakleamni amchea monantlim umttun uddoilelint. Thodde bhov kaljidar Goenkar hok’ magonk fuddem sortalet tankam bondkhonddicheam rund vonttim bhitor rudon korchem poddlelem.

Suttka melltoch amcheam bhurgeank ganv-ghorach nokri mellchi, udeog-dhondo vaddcho, noveo ievzonneo suru korcheo hem amchea Goenkaranchea vantteak ailem. Eka novea iugant amchea tarvanche aminch kopit zatoch kaim pavttim amchim tarvam ulltea vareak ani moddak sampoddlint. Xanti ani sovostkaie sangatak mhell-chikollui lotton ailo. Goenche lhan loksonkhek aplea tabeant dovrunk arm ukolpachi pasun pakleank goroz poddonasli. Suttke poilim pakleanchi palmator polloilearuch lok kamptalo. Khun, chorio ani her krur korneo zanche aiz ami herdderi zaleanv toslem tea kallar choddxem ghoddonaslem.

Kitem-i ghoddlem zalear tem porjeche nodrek haddpak Konknni, Moratti ani Inglez vortoman-potram naslim. Khobranchem prokaxonn choddxem Purtugezinuch zatalem, ani tenvui, mhaka dista, xarancheam ximam poltoddi pavonaslem. Aiz khun ani obsoeg Goenchea khuincheai konnxak ghoddlear, thoddeach vellan internettavhelean sogllea sonvsarak tacho sad pavta; sanz zata mhunnosor durdixnneacher sogllem dista ani sokallim uttonam borobor Inglez, Moratti ani Konknnint xapun, amchea nostea borobor, mezacher hajir asta.

Goenche suttkechim mhotvachim chovi-challis vorsam somplim. Thoddeach kalla modhem, Goeam songprodex aslem tem Bharatechem ek lhan punn okhondd raj zalem. Amchi maimbhas Konknni rajbhas zali. Kheddeamni bizli ani nollachem udok pavlem. Nodincher pul ube ravlet. Vahatuk vaddli, vikas zalo. Xikxonn xetrant ek krantich zali mhonnoieta.

Hachech borobor amcheam chalimnim ani ievzonneamnim chuki zait ravleot. Rajki fuddareanchi ani heranchi bezababdari hispabhair vaddlea. Porjechem visron sothacho faido korunk zaiteam zannamni sothea vapurlea. Kaido ani surokxa pasun bhonglea. Punn porkeanchi hukumxai hache poros pastt asli. Azun amchea hatant upai asa. Zhoim amcho hok’ magonk amkam vatt nasli thoim aiz ami amche fuddari ani amcho serkar amche sothen vinchun kaddttanv. He fuddari gineanache, gunnest, zababdar ani veovosthit ponnim cholpi aslearuch amche soglle proxnn tharear poddoieta.

Amchea hatan sothea asa. Sothek sodanch boll asta. Sothechem boll gineanan vapurlear amchim sopnnam kosleai moddar todd martelint. Punn ekdom gorjechem ani mhotvachem panvl martana titlech kottin, kaim vellar ghatki, adde-goindde choddche-denvche poddttat. Bariksann ani bhov kallji ghevpachi chodd goroz poddtta. Zababdareche nagrik mhonn fuddleo pillgo amkam lekteleot zalear, hi barisann ani kallji ami chalik launk zai.

Jai Goem, Jai Bharat!