PUSTOKAM

DEZ '05 – JAN '06  VORS 1; ANK 3

Mhozo Dishttavo
Mhozo Dishttavo hem pustok noveo kolpona, nove vichar vachpeam mukhar ghevn ieta and taka lagun pustokachi soglleaninch apurbai korunk zai, oxe udgar Dor Mhoineanchi Rotti masikacho sompadpi Pri Moreno de Souza, SJ, hannem sanglem.
Filomena Samfranciscochea pustokachea ugttavnechea dobajeak to Dezembrache 15ver Goem Konknni Akademichea sobhagorant uloitalo. Hem pustok vachlea uprant novea borovpeank sfurti mellteli ani tantuntlean nove borovpi ubzotele, oxem Pri Souzan fuddem sanglem. Onnbhovik somikxok Pra Priyadarxini Tadkodkar hinnem pustokachi ollokh dili.
Hea pustoka udexim Konknni bhaxent novim utram ani utramche zullnent bhor poddteli Apurbai Prokaxonn sonsthen ghoddovn haddlelea hea dobajeak GKAcho odeokx Pundolik Naik iezmanponn choloitalo. Borovpi chodd korun aple bhonvtonnchea somaza vhoir apleam pustokan ul'lekh korta ani hea pustokachi borovpinn Mumboi ravta, punn kheritponnim Hindu ani Katolk lokachea jivitancher tichem sahitia asa, oxem Xri Naikan aplea ulovpant mhonnlem. Filomenachea pustoka vorvim ostori borovpeanche volerint anink ek nanv nond zalem, oxeim tannem sanglem.
Borovpeamnim sodanch aple nodren dhei dhorun penn hatan ghevnk zai, ti ek povitr zababdari asa mhunn soglleamnim monant dhorunk zai, oxem Filomenan Samfranciscon sanglem. Survatek Xmt Hema Naik hinnem soglleank ievkar dilo. Kariokramanchem sutrchonchalan Devika Sardesai hinnem kelem. Hea dobajeak sabar borovpi ani borovpinnichim ghorchim hajir aslim.

 

Altoddi ani Poltoddi
Panch ani panch, zale don pongodd.”
“Khellgoddeanchi nivodd korum-ia…Chol, mat-mat-urio ghal-ia.”
“Mat-mat urio.”
“Chirio.”
“Konnak zai sorg, konnak zai emkondd…”
Amche purvoz khellun aileleam Goenche matientleam khellancher atancheam bhurgeancho visor poddla. Atancheam bhurgeanche khell mhunnllear T.V., Video, VDC ani oslem zaitem.
Willy Goesachi kadambori heam bhurgeanche khellantlean survat zata. Punn tantuntle kannient attaplele vixoi khup gombhir, chintleleachea gineanak sarem divpi ani amcheo khoddi-chukhi sorasor amcheam dolleam somur ugddapeo korpi.
Tarpona, magaslolo Goeantlo ek ganv. Nodichea pannian bhailea sonvsarak vegllo aslolo ganv to. Chakreank vo dusream kosleam-i kamak poltoddi vetolo zalear fer'ribottintolean vochunk zai. Zaite pavtt fer'ribott doriant modench bond poddtta. Akho dis vavr korun veginuch ghora vochun ilo visov gheunk chinteleanchim chintnam mollba ani udka modem xirkun urtat.
Mhunnttoch, hea lokak gorjen eka pulachi goroz. Ani dubhav na, to ubharpacheo rattavolli zorant vattek lagleleo astat. Te khorech doddle tor mun'xam-mun'xam modhem vospi vegllocharanche pul kedna doddttele? Ho boroch gombhir vichar vachpeancheam monamni ubho zata.
Pul ubho zaunchea poilim doriachea udkak lagun bhailea sonvsarak kuxin aslelea Tarmona ganvchea lokache jivit-chalichem vornnon Willy bhitorle nodrentlean kelam. Taka khorinch porbim favo. Toxinch Dalgado Konknni Akademichea karbhareankui amchim porbim. Tannim oxich novea borovpeanchem sahitia uzvaddavn, Konknni mollar nove borovpi utponn korche.
Willyn ekdom' sompi bhas vaporlea. Amchea ulovpantlim chalu utram, magir tim Inglezint zaum kivam Purtugezint zanv, vaporleant. Punn eke-eke kodden gorje bhair tannem Inglez ani Purtugez utrancho vapor kela-so amkam dista.
Panam: 99 Mol: 50 Rupia